lamho.n ke aazaab sah rahaa huu.N
lamho.n ke aazaab sah rahaa huu.N
mai.n apane vajuud kii sazaa huu.N
zaKhmo.n ke gulaab khil rahe hai.n
Khushbuu ke hujuum me.n kha.Daa huu.N
is dasht-e-talab me.n ik mai.n bhii
sadiyo.n kii thakii hu_ii sadaa huu.N
benaam-o-numuud zindagii kaa
ik bojhaa uThaaye phir rahaa huu.N
ik aisaa chaman hai jis kii Khushbuu
saa.Nso.n me.n basaaye phir rahaa huu.N
ik aisii zamii.n hai jis ko chhuukar
takadiis-e-haram se aashnaa huu.N
ai mujh ko fareb dene vaale
mai.n tujh par yaqiin kar chukaa huu.N
mai.n tere qariib aate aate
kuchh aur bhii duur ho gayaa huu.N
Bookmark to:
Tell a Friend
Leave a reply
You must be logged in to post a comment.